曼联半场捉猫抵博

魔粉诈型 寸王要补镬 英超联赛连续20场不败，都未必一定拎到前4架，讲紧嘅咪就係曼联囉！暂时以29战得54分排喺联赛榜第6位嘅红魔鬼，今晚将会作客包尾大幡新特兰。相信「寸王」莫连奴一定会落晒柯打，叫班曼联球星今晚醒醒定定，做番场好戏畀大家睇，以挽回面子，预料半场就可大胜对手，半场客胜绝对係信心之选！ （Now 621及LeSports HK应用程式周日晚8时30分直播) 曼联上轮联赛主场凭停赛复出嘅瑞典射手伊巴谦莫域补时阶段射入12码，以1比1逼和爱华顿，再次失分而回，班红魔迷唔失望就假啦！更有部分球迷不满门将迪基亚未能救出菲腊积基尔卡嘅入球，甚至癫到将输波归咎佢嘅新髮型，真係赖得就赖呀！赛后「寸王」都不得不承认，少踢一场嘅红魔鬼落后第4位嘅曼城4分，要争夺欧联入场券愈嚟愈难，如果球队伤兵情况未有改善，可能会将今季馀下目标转移至欧霸！不过，佢哋今晚对手只係鱼腩球队新特兰，相信赢波冇难度！ 6战零入球 新特兰打定输数 另边厢，开季至今30战只得20分嘅新特兰，上轮联赛作客惨吞李斯特城两蛋，领队莫耶斯赛后都表现得非常绝望，似乎已经打定输数！球队暂时落后喺安全区嘅史云斯8分，剩番8轮联赛，要追都咪话唔难呀！而且，黑猫已经连续6场比赛未入过波，进攻无板斧，相信都几难及时反弹。再加上，球队今季联赛主场得胜率只有20%，表现令人失望，今晚主场迎战红魔鬼输少当赢，心水推介曼联半场客胜！