拉素拿玻里大厮杀

欧联资格生死战 意甲今日上演欧联资格生死战，由排第4位嘅拉素主场迎战「3哥」拿玻里。拉素目前落后对手4分，要抢入三甲今仗非胜不可，王牌前锋恩莫比尼近8仗怒轰8球脚风超顺，主场肯定抢钱咁抢；拿玻里属意甲火力最勐球队，两队驳火格局，大细中位数调至2.5/3球，都要捧1.77倍入球大！ （TVB 302周一凌晨2时45分直播） 拉素喺下半季冲刺唔讲得笑，近8场联赛6胜2和未输过，夹埋入咗17粒波，而且啱啱喺意大利盃杀入决赛，气势坚吓亲人。拉素依家只係落后第3嘅拿玻里4分，今仗赢埋就可以缩减到只差1分，主场出击战意必盛，肯定疯狂扑击。教头施蒙尼恩沙基上周三度过41岁生日，班球员自然更加落力争取入波，送份大礼畀主帅啦。 拉素近期着晒火最大功臣係箭头恩莫比尼，呢位意大利国脚喺各项赛事近8仗攻入8球，重现金靴射手本色，有佢喺度拉素要入波唔难，不过拉素上周中意盃有荷兰中坚迪维积受伤离场，若然未能复出，防守力必大减，但咁样亦迫使施蒙尼恩沙基豁出去，以攻代守同拿玻里死过。 拿玻里铁三角火力惊人 拿玻里除入波数目冠绝意甲外，今季亦係联赛「作客王」，14场作客赛事只有两场冇波入，总共轰出惊人嘅35球！原因係佢哋转守为攻非常快速，作客比赛往往可以尽展所长，对上8场作客联赛都攻入至少2球，不过当中亦有7仗有失波，证明拿玻里唔会因为作客而踢得保守。阵中3大「士哥拿」梅顿斯、咸锡同恩斯治尼今季联赛夹埋入咗43球，呢个铁三角组合唔讲得笑，既然今仗两军锋力都咁强悍，捧入球大包冇走鸡！