祖记够料复仇巴塞

希古恩升呢挑机美斯 今晚欧联8强首回合上演2015年决赛翻版，祖云达斯主场迎战巴塞隆拿，两年前巴塞喺柏林以3比1击败祖记，不过时移世易，今趟去都灵就冇咁易得手，因为祖云达斯近21场欧洲赛主场录得12胜9和不败佳绩，加上前锋希古恩着晒狂入波，巴塞防中布斯基斯停赛下，连带后防都要执位，恐怕招架唔住呢位前皇马神锋，平手盘祖云达斯值博。 （有线61、64、201、203台周三凌晨2时45分直播） 祖云达斯两年前不敌巴塞后，中前场人脚出现好大变动，泰维斯、派路、保罗普巴、维达尔等人离队，取而代之係希古恩、文迪苏杰、基迪拉、保罗戴巴拿等勐将，前3者更加係「西甲通」，包括效力过皇马嘅希古恩同基迪拉，熟悉巴塞底细，其中希古恩18次斗「地上最强」，射入3球，虽然数字唔算标青，但呢位阿根廷国脚经多年磨练后，现已成为顶级射手，除咗上季以36球夺得意甲神射手之外，今季意甲亦已轰入21球，成为祖记近59年以来，第1位首季加盟就取得联赛入波「20+」球员，脚风比巴塞同胞美斯更顺。 祖记另一大优势係联赛已甩开主要竞争对手，可全力争夺欧联，佢哋今届欧联8战获得6胜2和，水准好平稳。反观巴塞喺西甲争标路上陷于苦战，耗力甚大，球员踢到躁，难怪上场西甲0比2输畀马拉加，尼马被逐后，仲向球证做讽刺手势，佢随时被加重处罚，难免影响士气。 球证马斯历克再做巴塞凶星 事实上，正如祖记中坚邦路斯所讲，现时巴塞比两年前弱，除咗「MSN」威力有所下降之外，作客表现更急插水，近5场作客输咗3场，包括欧联16强首回合作客惨吞巴黎圣日耳门4蛋，更唔好彩係该场球证马斯历克将会主吹今场大战，巴塞球员再见到佢，都咪话唔心寒。 巴塞仲有一个不利因素，就係布斯基斯停赛，呢位西班牙国脚一直係球队防中必然正选，全靠佢不遗馀力喺中场扫荡，其他中前场球星先至可以专心进攻，基本上冇人可以代替佢嘅位置。教练安历基好可能要将中坚马斯真兰奴推前客串防中，牵一髮动全身，希古恩正好趁机骚哥利。