早前因小保加球员受袭延期嘅南美自由盃决赛次回合，经历多次扰攘之后，香港时间周一凌晨会移师中立场西班牙马德里举行。首回合主场同河床打成2比2嘅小保加，近期出战自由盃开局都好抢攻，加上队中射手当旺，呢场肯定先下手为强，一于撑佢的「第一队入球」。
（有线602及662台周一凌晨3时30分直播）
呢项南美球会最高级别嘅赛事之所以被命名为自由盃，其实系向18至19世纪拉丁美洲独立战争期间，一班浴血奋战，为南美洲争取脱离西班牙等宗主国殖民统治嘅烈士致敬，背后极具历史意义。
泰维斯挞着有料到
可惜呢场原本属于阿根廷、甚至全南美洲嘅足球盛会，由于小保加球员早前被催泪弹袭击，搞到原定由河床主场出击嘅次回合赛事未能如期举行，之后南美足总仲为左丰厚电视转播收入，将比赛移师西班牙马德里再战，呢个决定即刻激嬲唔少南美球圈人士，皆因呢次选址根本违背左赛事本身嘅象徵意义，连小保加名宿列基美都睇唔过眼，直言咁嘅决定系荒天下之大谬，仲寸呢场波好似贵价嘅友谊赛添！
撇除场外纷争，呢场小保加对河床嘅「超级打吡战」决赛戏码的确好吸引，两队死对头每次交手都斗到难分难解，今次首回合喺小保加主场踢，双方就打成2比2激到爆。睇番小保加近5次出战自由盃，4次都先取得入波，呢场有弗爆射手宾尼迪图同泰维斯压阵，唔想和波踢加时，随时一开波就抢缰，小保加第一队入球值博。
