今晚英格兰联赛盃8强爆发北伦敦打吡，阿仙奴喺主场火併死对头热刺。双方今个月先喺联赛碰过头，阿仙奴同样喺酋长球场以4比2反胜热刺，何况佢的近年喺自己地头专恰死敌，今仗仲唔使让波，平手盘必捧阿仙奴。
（周四凌晨3时45分开赛、马会网上文字直播）
今次系阿仙奴、热刺两支北伦敦死敌本月内第2次交锋，上次联赛碰头，阿仙奴喺半场落后1比2劣势下，换边后连轰3球反胜4比2，赢得极具说服力，成功扫走季初接连不敌曼城、车路士嘅阴霾。虽然阿仙奴日前联赛作客以2比3不敌修咸顿，近22场不败亦告断缆，不过嗰场有梅斯达菲等中坚停赛，防线天残地缺，输波亦无话可说。
近9次主场踢打吡战未输过
阿仙奴自联赛揭幕战于地头输畀曼城后，已经连续13战主场不败，加上近9次主场出战北伦敦打吡，取得6胜3和，今次续于酋长球场呢个福地迎敌，信心爆棚。
热刺喺联赛排名高过阿仙奴，但佢的今季盃赛成绩麻麻，其中英联盃第3圈仅凭互射12码淘汰屈福特，6场欧联分组赛亦只有1场保持清白之身，最终能够出线16强，某程度上多得国际米兰自毁长城打和燕豪芬；阿仙奴对上2圈英联盃先后淘汰英冠嘅宾福特及英甲嘅黑池，所受考验不大，不过佢的喺今届欧霸6战5胜1和，当中5场冇失过波，防线演出相对比热刺稳健，而王牌奥斯尔近期不受重用，今仗誓要踢争气波，难得主场出击唔使让波，平手盘梗系拣番「兵工厂」喇。
