爱华顿遇强脚软
周一凌晨英超圣诞快车上演大战，爱华顿将于主场硬撼热刺。岩岩喺联赛盃淘汰北伦敦死敌阿仙奴嘅热刺，近期走势强劲，尤其一班前场攻击手弗到爆，今场对住Big6私房菜「拖肥」爱华顿，热刺就算作客都有大把本钱赢波，只让平半，一于捧上盘。
（Now 621周一凌晨零时直播）
近7仗联赛豪取6胜嘅热刺频频踢出争气波，当中就包括早前以3比1击败主要竞争对手车路士，上仗再喺联赛盃以2比0作客成功爆「厂」，淘汰死敌阿仙奴，士气大振。值得留意，热刺系今季联赛唯一一队冇出现过和局嘅球队，非赢即输，绝对睇得出领队普捷天奴班波嘅斗心。
热刺中前场一班攻击手状态大勇，尤其向来以精湛射术见称嘅王牌前锋哈利卡尼，今季同队友完美配合，交出助攻嘅能力都有明显提升，表现更加全面。上仗面对兵工厂，哈利卡尼就再次交出靓传造就队友迪利阿里埋斋，加上孙兴民同卢卡斯莫拉近期都屡建奇功，可见热刺前场火力绝对不容低估。
近3交锋拖肥全败
「拖肥」爱华顿今季喺领队马高施华带领下，发挥虽比上季有起色，不过遇到强敌即刻冇晒符；今季5次面对Big6球队，爱华顿录得1和4负，明显系典型欺善怕恶嘅球队。睇番往绩，爱华顿近3次面对热刺全部输晒，畀对手食住个势，今场形势不容乐观，宁愿捧番热刺上盘好过。
