拆礼物日都有意甲睇
拆礼物日唔只有传统英超开快车，意甲同样冇得休息，今晚10点「黄金档期」共有5场赛事，重头戏为榜首祖云达斯作客阿特兰大。阿特兰大本身实力已经不及对手，今场仲有两大后防主将缺阵，要阻挡势如破竹嘅祖记可谓难上加难，客W放心捧。
（Now 638、有线654及614台周三晚10时直播）
自从「葡萄牙球王」基斯坦奴朗拿度（C朗）登陆意甲，令呢个联赛当堂「生晒」！不过意甲赛会似乎未够喉，今季破天荒喺拆礼物日同12月29日安排两轮联赛，踢完先歇冬，摆明同英超「抢生意」！虽然成效如何仲系未知数，但圣诞档期除左英超仲有意甲睇，对球迷嚟讲绝对系好事。
8场客战全胜
讲番今晚嘅焦点祖云达斯作客阿特兰大，祖记今季17场联赛16胜1和，已经创下球队史上最佳联赛开局，而且佢的今季8场作客保持全胜，水准极其稳定，除左王牌C朗连续6场联赛作客有士哥，另一箭头文迪苏杰喺C朗掩护下，今季喺多场关键大战更屡建奇功，包括近期赢罗马及国际米兰都系靠佢一箭定江山，较早时间击败AC米兰及拿玻里，文迪苏杰个人亦射入3球，唔好忘记前线仲有保罗戴巴拿，对手要抵挡呢个进攻铁三角真系唔容易。
阿特兰大近期虽然都有前锋杜云沙柏达着火，近4场联赛个人入6球，不过佢的失球数字一样多，近7场联赛只有1场保持清白身，6场加埋失10球，而且上场作客输畀热拿亚1比3更加损兵折将，两大后防主力拉菲尔杜莱及柏洛文奴喺末段领红牌被逐，今场齐齐坐波监，对本已不稳嘅防线可谓雪上加霜，以祖记今季水准应可轻鬆再攞3分。
