肥安带仁扫皇

师傅出招教训徒弟 欧联8强首回合爆发「冠军前哨战」，德甲班霸拜仁慕尼黑主场迎战衞冕嘅西甲雄师皇家马德里，今仗亦係两军主帅安察洛堤同施丹嘅师徒对决。拜仁教头「肥安」乃皇马2014年实现「欧联10冠」嘅功勳主帅，对「银河舰队」瞭如指掌，今仗倒戈要报当年被炒鱿屈辱，必定施展毕生功力，拜仁喺几近无敌嘅主场有望先声夺人，1.6倍主胜抵玩！ （有线61、64、201及203台周四凌晨2时45分直播） 皇马自02年第9度捧欧联后，苦等第10冠多年，直至13/14球季由「肥安」安察洛堤上任，并委任法国宿将施丹做助手，当季两人夹手夹脚率领皇马喺决赛赢马体会，一圆欧联10冠美梦。可惜好景不常，1季后「肥安」未有因夺欧超盃、世冠盃而获得信任，反而因下半季喺联赛及欧联接连失利被炒鱿，今仗咁跷对番已经坐正嘅徒弟施丹，梗係出招教训徒弟兼报仇啦！ 拜仁欧联主场战绩超劲 拜仁今仗虽然有门将纽亚、中坚晓姆斯同前锋汤马士梅拿受伤，不过呢支德甲劲旅主场战绩太劲，近16仗欧联主场出击，居然获15胜1和超劲战绩，数番上次欧联主场输波，咁啱就係2014年4月惨吞由「肥安」领军嘅皇马4蛋，如今连「剋星教头」都收归旗下，要喺安联球场演复仇战砌低「银河舰队」并唔係太难。 皇马缺两铁衞中门大开 皇家马德里本身都有伤兵问题，中坚华拉尼伤患仲未康复，上仗联赛仲伤埋葡萄牙中坚比比，冇咗两大硬汉镇守中路，皇马防线都几令人担心。虽然施丹上季中途接手皇马后，带领球队第11度欧联封王，但佢注重突击嘅战术过于单调，遇上曾3夺欧联嘅师傅「肥安」，经验肯定不足，加上自改制后，欧联从未有球队可以蝉联冠军，施丹要打破魔咒更加係难上加难。