周一下午澳职大战，中岸水手主场挑战「3哥」珀斯光辉。水手今季表现不堪入目，9轮战罢仲未赢过波，喺积分榜垫底，呢场对住前列分子珀斯光辉，根本难有抢分机会，捧客胜。（Now 638、有线614及654台周一下午4时直播）
水手7连败信心尽失
上季联赛排名包尾嘅中岸水手，今季矢志摆脱鱼腩部队称号可惜有心无力，引入上季效力墨尔本城嘅前锋罗斯麦哥马克，希望可以靠佢出色嘅入球能力为球队增加抢分筹码，可惜呢位苏格兰射手加盟至今上阵5仗入得1球咁大把，表现唔对办，早前仲喺操练期间受伤，呢场肯定唔使预佢。加上其他队友都唔争气，上轮1比2输畀纽卡素喷射机，球队已经惨吞7连败，士气跌落谷底，呢场对住强敌珀斯光辉，边有咁易偷到鸡。
相反，珀斯光辉虽然上仗喺前列大战中，被FC悉尼打破本季不败身失去榜首，不过整体表现依然强劲，就算作客发挥都唔走样，近4作客取3胜1和，呢场仲有西班牙中场迪亚高卡斯度伤愈复出候命，而且光辉呢场赢波就重登榜首再过一哥瘾，对住包尾大幡水手肯定冇手软，客胜有1.65倍咪错过。
