2019送旧迎新扫霉运
今日系元旦日，英超亦嚟到圣诞节新年快车尾站，正所谓新一年新开始，岩岩新败嘅北伦敦双雄热刺同阿仙奴分途出击，今晚难得遇弱，梗系想喺2019年首日用赢波冲喜，开个靓头重上正轨。
阿仙奴主场搵富咸洩愤
今晚英超爆发伦敦打吡，阿仙奴主场迎战富咸。阿仙奴喺年尾畀利物浦大炒一镬坚冇瘾，众将谷埋谷埋一肚火，挟近9场主场联赛7胜兼不败之势，势必搵弱旅富咸祭旗，让球主胜咪错过。
（Now 621周二晚11时直播）
阿仙奴近期防线劲多伤兵，上仗作客利物浦领先1粒之下，竟接连犯错反输1比5，表现七国咁乱坚肉酸，前锋奥巴美扬全场只系13次掂波，其中6次系中圈开波，赛后主帅艾美利话会严肃处理种种问题，随时同众将「照肺」。而且会作出一些改动，尤其系前线只得伊禾比推波组织做到威胁，预计今仗会复用箭头拿卡锡迪，呢位法国前锋具备hold波策应等支点作用，可令奥巴美扬更多空位搵机会，喺短时间内难改善防守下，预计「兵工厂」会以攻代守。
富咸内乱作客曳爆
仍在下游挣扎嘅富咸，虽然上仗补时入波击败哈特斯菲尔德1比0，走出6场不胜困局抢得救命3分，不过喺比赛期间，原本系球队刽子手嘅阿历山大米祖域，却畀阿布巴卡卡马拉抢射12码仲宴客，一向老好人嘅主帅云尼亚里，赛后都嬲爆话卡马拉唔尊重球队，嗰时真系想杀左佢，睇嚟内部唔多和谐。况且富咸客场坚曳，近8场作客联赛不胜兼输左7场，其中6仗至少输2粒，相反阿仙奴自首轮不敌曼城后，近9仗主场联赛取得7胜2和，其中6仗至少赢2粒，加上岩岩惨败，誓搵富咸发洩，让球主胜有计。
热刺博反弹半场■卡城
英超圣诞快车去到周三凌晨，卡迪夫城主场挑战热刺。热刺今季延续圣诞新年快车之王嘅传统，近期走势强劲，其中南韩Oppa孙兴民状态火热，随时半场都可以搞掂实力欠奉嘅卡迪夫城，半场客胜值博。
（Now 621周三凌晨1时30分直播）
圣诞新年赛期可以话系英超嘅传统，每逢呢段赛程表现最抢眼嘅球队，肯定非热刺莫属，近5季「快车期」热刺总共出战19次，取得15胜3和1负佳绩，包括今季以6比2同5比0先后击败爱华顿同般尼茅夫，火力全开。其中前锋孙兴民近3次上阵就入左4球脚风奇顺，呢位攻击好手虽然嚟紧要代表南韩出战亚洲盃，但系都好识做，不惜牺牲亚洲盃头两仗分组赛嘅上阵机会，延迟同国家队会合，留队帮热刺抢分，求胜心冇得弹。上仗热刺意外失分输畀狼队之后，积分榜已经畀榜首嘅利物浦抛离9分，为重回争标行列，呢场肯定一开波就抢攻。
近8联赛7次早领先
新升班嘅卡迪夫城，实力明显欠奉，尤其遇到强队时多数都冇还手之力，今季6次面对Big 6球队全部输晒，早前就以1比5惨败畀曼联。况且热刺近期联赛好抢缰，近8仗联赛7次半场就取得领先优势，呢场面对弱旅卡迪夫城，绝对有本钱先下手为强，撑半场客胜。
