苏B手握普巴说明书
今晚英超圣诞新年快车尾场，重拾佳态嘅曼联作客「喜鹊」纽卡素。曼联自从苏斯克查中途接手后，抑压多时嘅魔性重新爆发，其中王牌保罗普巴更加弗到漏油，令红魔火力全开，不过「喜鹊」亦急需抢分护级，今场有地利唔会坐以待毙，斗攻格局一于捧2.5球嘅入球大。
(Now 621周四凌晨4时直播)
曼联新帅「苏B」苏斯克查上任后，一改前任摩连奴死气沉沉嘅闷蛋打法，重新打出传奇教头费格逊年代嘅进攻气势，佢领军头3场赢晒兼狂轰12粒，睇到粉丝赏心悦目；「苏B」最高明一招，系畀到中场保罗普巴入楔嘅自由度，呢位法国国脚近3场便攻入4球及交出3次助攻，佢一个就製造左7个士哥，佔左球队呢3场总入球58.4%，而且佢射门、中龙、掂波及製造埋门机会次数，亦系全队最多，明显「苏B」手握普巴说明书，识用过摩连奴多多声。
不过佢上任后3场有失球，连埋之前嘅比赛，曼联已经连续8场未能保持清白之身，防线唔算稳健。
纽卡素宾尼迪斯擅反击
位于联赛下游嘅纽卡素，上场联赛领先下完场前失守，被屈福特逼和1比1，仍极需抢分护级，今次回师主场唔会做缩头乌龟，而且曼联进攻压得咁前，擅打反击战术嘅「喜鹊」主帅宾尼迪斯，可谓合晒合尺。联赛连盃赛在内，曼联近8场共轰22球，全部都开3球或以上，既然佢的都系有前冇后，2.5球嘅入球大比客W更好分头，捧大盘更上算。
