状态回勇抢分追巴塞
西甲歇冬期过后战火重燃，周五凌晨维拉利尔将于主场同皇家马德里进行补赛。皇马岩岩喺世冠盃称王，其中多位球员都打出水准，今场肯定希望将好势头带番联赛，顺势击沉处于水深火热之中嘅「黄色潜艇」，喺2019年首仗打响头炮，1.7倍客胜捧得过。
（Now 632周五凌晨4时30分直播）
先讲维拉利尔，上季联赛最终排名第6位嘅「黄色潜艇」，自2013/14赛季重返顶级联赛之后，近年一直成为出战欧洲赛嘅中坚分子，可惜球队今季再次深陷降班危机，联赛16轮战罢只系攞到15分，积分榜排名倒数第3，上季带领球队取得佳绩嘅主帅卡利查都因此被炒鱿，最惨系接任嘅新帅路尔斯加西亚都似乎冇乜料到，上仗面对联赛包尾大幡侯尔斯卡，结果都系畀对手临完场入番粒逼和，可想而知队波有几曳。维拉利尔士气跌落谷底，就算今次有主场之利，但根本冇本钱同皇马斗。
马高斯洛兰迪孭飞搏杀
相反皇马岩岩捧起世冠盃攞晒彩，其中喺决赛4比1击败东道主艾阿恩一役，小将马高斯洛兰迪射入靓绝世界波表现抢眼，呢位23岁中场重回银河舰队之后鲜有机会上阵，但冇自我放弃之馀，仲操出6旧条理分明嘅腹肌，状态绝对毋庸置疑，今场有望再获主帅苏拿利重用。况且皇马近期联赛走势回勇，收穫3连胜之馀仲未失过1球，为收窄同榜首巴塞隆拿嘅8分差距，今场肯定全力争胜，睇好银河舰队可以成功擸走3分，客胜咪走宝。
