红鑽上海SP主场撑得过

F组双雄赢开继续赢 亚冠盃Ｆ组今晚上演第二轮分组赛，两支首轮作客赢波嘅球队浦和红鑽、上海ＳＰ齐齐返回主场出战。红鑽迎战近年患上「作客恐日症」嘅ＦＣ首尔，小让平半上盘抵玩（Now 670、Fox Sports Play周二晚6时30分直播）至于上海ＳＰ上届打入亚冠盃8强全凭超强主场表现，6仗主场取得5胜1和，面对西悉尼流浪者可热捧「让主」。 （Now 671、Fox Sports Play周二晚７时30分直播） ＦＣ首尔患「作客恐日症」 上季日职亚军浦和红鑽今届阵容变动唔大，故此开咧冇耐已迅速入局，虽然佢哋先后喺日超盃及联赛以同样比数2比3输畀鹿岛鹿角及横滨水手，不过连同首仗亚冠盃分组赛作客4比0大胜西悉尼流浪者，红鑽近3仗比赛一共轰入8球，进攻火力全开。相比之下新一季韩职尚未开锣，ＦＣ首尔状态明显较差，前锋丹恩奴域上仗连12码都唔入，结果令球队喺主场0比1输畀上海ＳＰ，最惨係ＦＣ首尔近年喺亚冠盃作客日职球队都冇运行，对上3次全部输晒，包括上届16强首回合输畀今场对手红鑽，今次再访凶地难睇好。 上海强兵恰西悉尼 同组中超球队上海ＳＰ主场迎战澳职西悉尼流浪者。上海ＳＰ今季来势汹汹，除由葡超名帅保亚斯领军，仲以高价购入巴西中场奥斯卡杜斯山度士，配合上季尾加盟嘅锋将侯克、以及曾帮广州恒大两度赢过亚冠盃嘅艾杰臣，力足威胁恒大嘅擂台趸位置。上海ＳＰ係上届亚冠盃8强分子，由外围赛开始至淘汰赛，佢哋上届踢咗6场主场比赛攞到5胜1和，水准稳定，今届首次喺主场出击，想赢近期疲态毕露嘅西悉尼冇难度。