吸取教训唔敢轻敌
今晚英超独脚戏，曼城喺主场迎战狼队，两军近况同样不俗，不过「蓝月亮」吸取早排连败嘅教训，面对遇强愈强嘅狼队，相信唔敢轻举妄动，加上狼队近10场联赛有9次开出3球或以下，中位数3.5球嘅入球细值得捧场。（Now 621周二凌晨4时直播）
曼城近期状态回勇，豪取4连胜狂轰21粒，包括上周中英格兰联赛盃4强首回合狂数伯顿9比0，打番起信心，小将菲尔科顿更连续2场有士哥，赛前佢都话准备就绪踢今仗。
狼队唔驳火玩突袭
「蓝月亮」超班实力毋庸置疑，加上今战于地头出击，赢波机会高唱入云，不过能否大捷就系另一回事。毕竟喺圣诞快车初期接连输畀水晶宫同李斯特城，若非喺月头榜首大战主场赢「1哥」利物浦2比1，联赛争标形势会更加严峻，「长途赛」最讲求稳定性，一场波赢1球攞3分，赢10球又系3分，吸取早前轻敌搞到2连败嘅教训，相信曼城都唔敢场场都狂攻。
另一边厢，狼队上周中喺英格兰足总盃将利物浦踢出局，话就话对手出副选，但呢隻狼唔讲得笑，唔单止近7场联赛取得4胜1和2负，而且专拣强队嚟咬，今季联赛7斗Big 6球队，录得2胜3和2负，包括上年年尾反胜热刺3比1，曼城想赢绝不能大意。狼队近期倾向先求不失，再伺机突袭求胜，绝少与对手驳火，近10场联赛有9次开3球或以下，今仗作客唔会冒进，加上近3次交手，两队夹埋入得4粒咁大把，博3.5球嘅入球细好路。
