淘汰赛阶段让波蚀章
今晚续有亚洲盃16强激战，最瞩目嘅梗系夺标热门日本硬撼沙特阿拉伯。「蓝武士」虽然分组赛3场赢晒，但入局慢欠缺霸气，加上喺近届亚洲盃淘汰赛战绩麻麻，今仗随时老鼠拉龟冇碇埋手，法定时间未必搞得掂沙特，转捧让球客胜。(Now 671周一晚7时直播)
日本喺今届F组分组赛3战全胜，但千祈唔好畀个绩唉到，首仗对住弱旅土库曼竟然先落后，几经辛苦先反胜3比2；次轮对阿曼早段入波后不思进取，最终仅赢1粒；尾轮收起10名主力，以2比1反胜同样副选应战嘅乌兹别克，表现毫无霸气，除左大迫勇也算OK之外，「蓝武士」缺少一名可靠射手压阵，佢之前右臀有伤，休息左几日，寻日先至首次着波砵练习，状态成疑。
另一边厢，沙特阿拉伯喺E组分组赛头2场赢晒后，尾场爆冷输畀卡塔尔，相信今仗会打醒十二分精神，加上射手艾达华沙利坐完波监复出，不容小觑。翻查纪录，日本于近7场亚洲盃淘汰赛，法定时间只得1胜5和1负，其中3场要踢加时甚至互射12码才赢波晋级，表现咁「立」，预计沙特可以喺法定时间顶住唔输，受让必捧让球客胜。
乌兹别克唔赦澳洲
至于夜少少有上届盟主澳洲火併乌兹别克，「袋鼠国」今届表现麻麻，喺B组首仗分组赛落笔打三更输畀约旦，之后连赢2场，亦只得次名出线。虽然守将沙尼贝利刑满复出，但自从射手卡希尔退出国家队后，佢的进攻冇乜太多板斧。相反，乌兹别克自名帅古柏接手后，尤其系快速反击非常煞食，喺F组分组赛头2场赢晒，尾场收起部分主力，仅以1比2不敌日本，虽败不辱，今仗绝对唔赦澳洲，有得受让梗系捧让球客胜。
