「龙之杀手」阿迪沙格拉颂压阵
亚洲盃16强开打，今晚就有泰国火併中国。国足今届开局眼前一亮，尤其系前锋武磊表现抢眼，可惜佢有伤在身，面对有「龙之杀手」压阵嘅泰国，国足好难过到骨，泰国让球主胜好路。
(Now 671周日晚上10时直播)
亚洲盃赛前，中国队连场闭门热身赛表现欠佳，就连一班不嬲锺意将中国队睇高一线嘅国足球迷都冇眼睇，搞到老帅纳比愁眉深锁。好在国足今次大赛开局够争气，连赢吉尔吉斯同菲律宾，即使尾轮对南韩输波都能以次名出线。不过今届赛事表现抢眼嘅前锋武磊，左臂伤势唔多乐观，呢场就算顶硬上，表现都难有保证。
另边厢嘅泰国，喺确定16强对中国后，教练团已经放风话赢国足「其实唔难」！佢的之所以咁有自信，原因系佢的唔只有邓达、猜拿迪普桑格辛呢啲猛将，仲有一个绰号「龙之杀手」嘅27岁前锋阿迪沙格拉颂（圆图），佢喺2013年6月15日泰国作客友赛中国场波，第一次披上国家队球衣就入左两球，帮助「战象」爆冷大胜5比1。跟手2014年2月25日，2014年亚冠盃分组赛武里南联客场出战山东鲁能，佢又喺补时阶段入波，逼和主队。然后2014年仁川亚运足球16强中泰大战，阿迪沙格拉颂又起孖，助泰国赢2比0淘汰国足，中国球队真系见亲佢都头痛。
猜拿迪普桑格辛■■要藉机搵新东家
对于效力日职北海道札幌冈萨多嘅中场猜拿迪普桑格辛嚟讲，呢场16强仲有另一层意义：「日职、韩职、澳职以至其他国家，都有球探喺度，只要泰国球员踢得出色，亚洲盃后就有机会去其他亚洲联赛历练。」况且，呢场系主力邓达第99场国家队赛事，如果顺利晋级就达到100场嘅里程碑，为名为利，泰国定必搏到尽，「让球主客和」中国仲要让波，泰国让球主胜有买趁早！
