哥帅落柯打唔搏冇正选.
今晚英超头场，「2哥」曼城作客包尾嘅哈特斯菲尔德。虽然曼城近况回勇，但主帅哥迪奥拿一向要求高，落柯打边个唔搏尽就咪使旨意担正，面对处于无帅状态嘅哈特斯，仲唔趁机踩多两脚羊？就算让两球都要捧让球客胜。
(Now 621周日晚9时30分直播)
曼城自圣诞快车初段意外2连败后，近期极速反弹，各项赛事豪取5连胜，包括于榜首大战2比1勇挫利物浦，保住争冠希望，若果单计近3仗赢晒之馀，更狂轰19粒，场场至少赢3粒坚猛火。要数近期最弗嘅曼城锋将，梗系加比尔捷西斯，上面嗰24球里面，捷西斯便佔左其中7粒。不过日前牛一嘅「寿星佬」哥迪奥拿一向要求高，佢话「耶稣仔」已经进步紧，但仲要再提升，因为曼城只会打单箭头，而佢系同「蓝月亮士哥王」阿古路争位，若果唔做到最好点争赢呀？
查实其他位置都竞争激烈，就连伤愈冇耐嘅中场主力奇云迪布尼，近期亦抢唔番正选位置，因为贝拿度施华、菲尔科顿都几弗，翼锋位又有史达宁、利莱辛尼、马列斯争崩头。加上早前有轻敌之嫌搞到2连败，几乎断送争标机会，哥帅深明要追贴榜首利物浦，真系不容再失，务求众将要场场交足货，近期强势反弹绝非偶然。
「无帅」哈特斯遇强即屈
哈特斯今季表现差劲，近10场仅1和9负，依家沦为包尾大幡，带队升班兼上季成功护级嘅功勳主帅华拿，最近亦引咎辞职，暂由助教顶住先，处于无帅状态，状态、士气唔慌好喇。何况哈特斯遇强即屈，今季联赛6次斗Big 6球队全败之馀，其中5次换边前已经落后，由头输到尾，面对火力全开嘅曼城，随时崩溃狂输，曼城让两球都冇有怕，直取让球客胜。
