今晚西盃8强首回合，皇家马德里先喺主场迎战基罗纳。「银河舰队」有却奥斯及马高斯洛兰迪等人复操，今仗好大机会披甲，面对沉到爆嘅基罗纳，为尽早锁定出线，势必藉地利大炒一场，直取让球主胜。
（周五凌晨4时30分开赛）
基罗纳近8仗不胜
皇马虽然上仗联赛击败劲敌西维尔升做「3哥」，但查实近期表现飘忽，尤其系西盃16强次回合以0比1输畀雷加利斯，就算两回合计赢3比1晋级，依然畀人插到开花。当然主帅苏拿利亦有苦自己知，因为却奥斯、马高斯洛兰迪、加里夫巴利、马高阿辛斯奥及基罗拿华斯等全部伤晒，好彩前两者已经复操，今仗大有可能复出救驾，总算令皇马中前场人脚齐整番啲。
基罗纳同样面对伤兵满营嘅苦况，阿地宾尼迪斯、柏德列罗拔士要抖到下个月，莫积卡更提早收咧，搞到战绩大跌Watt，连埋盃赛，佢的近8仗未赢过，上次赢波已经系上月头嘅事，曳到冇朋友。
加上双方近两次交锋，皇马分别大炒4比1及6比3，赢亲都大大镬，信心自然倍增。基于西盃赛程咁密，「银河舰队」梗系想趁主场狂数对手，早早扩大领先优势，次回合就唔使搏到咁尽，今场让球主胜有计。
