班霸拜仁慕尼黑喺安联球场迎击史特加，呢场系南部打吡，基于榜首多蒙特歇冬后首仗又赢波（未计算昨晚对汉诺威赛果），搞到联赛6连胜嘅拜仁仍然未能拉近差距，而且得失球差亦大幅落后，想喺次循环收复失地争取卫冕德甲，主场对「私房菜」史特加呢啲波不但冇失分空间，仲要尽量争取大胜追近得失球差，今场「让球主客和」拜仁让到3球咁辣就知唔小野，一于博有2.47倍让球主胜。
（on.cc东网周日晚10时30分直播）
拜仁歇冬后首战作客击败贺芬咸，过程虽然唔算轻鬆，不过整体精神面貌明显比去年底进步，虽然目前仍有洛宾、列贝利同哥伦天杜利素等伤兵，但前线仍然有足够卡士攻击手攻坚，已经表明想争取教练尼高高华重用嘅「J神」占士洛迪古斯，今晚会得到两个半月以来首次正选机会，必定打甩髀，何况拜仁向来恰死史特加，近15次喺德甲碰头赢左14次，唯一例外系上季煞科战，拜仁稳得冠军后嘅例行公事至输番场，可见呢个对赛组合根本冇得挥。
客军纸扎防线好易散
史特加今季持续低迷，去年十月已炒过一次教练（泰亚芬哥古特），现任主帅韦恩薛亚亦面临被炒压力，史特加目前排紧尾三，18战只得14分已经刷新左球会史上同期最差战绩，失38球更比上季全季失球多出两球，防线曳到爆，尤其后防定海神针班捷文柏华特养伤后更如纸扎，近期联赛遇上攻力一般嘅对手都3连败共失8球，上仗歇冬后主场面对实力麻麻嘅缅恩斯都被轰入3粒，全场更处于捱打状态，除门将薛拿演出水准已尽量减少失球外，其馀落场球员表现无一合格，今晚对住如狼似虎嘅班霸拜仁，难逃再次被大炒厄运。
