英超周中开快车，周三凌晨纽卡素将于主场挑战2哥曼城。「蓝月亮」曼城同一时间要应付4条战线，对球员体力消耗肯定好大，加上由「战术大师」宾尼迪斯带领嘅「喜鹊」纽卡素踢法不嬲保守，呢仗有力喺半场前守住曼城攻势，半场和系好路。
（Now 621周三凌晨4时直播）
蓝月亮4线作战焗轮换
卫冕英超嘅「蓝月亮」阵中人才济济，不过球队仲要同时间面对英足盃、英联盃同欧联，赛程铺排到密质质，为免搞到一班球员过度疲劳，领队哥迪奥拿都逼住要进行轮换，好似季初受伤嘅奥达文迪、班捷文文迪同戴尔夫等，近期都多番机会上阵，但系轮换得太激烈，球员之间默契肯定有所削弱，变相影响球队表现，为左保持竞争力，睇怕哥迪奥拿都要谂谂计。
下游分子纽卡素排名联赛倒数第4，为护级都仲要加多两钱肉紧。「喜鹊」本身质素认真一般，出晒名孤寒嘅班主艾殊利又闩实水喉，唔肯注资为球队增兵，「喜鹊」可否坚守英超席位，都真系好睇领队宾尼迪斯嘅排兵布阵，呢位西班牙主帅出名战术保守，近3次主场带领球队面对Big6劲旅，半场都成功逼和对手，呢场对住超班劲敌曼城肯定照办煮碗，半场和捧得过。
