曼联欧霸做细界

嚟紧英超砌「车」要留力 今晚欧霸8强首回合，大热门曼联作客硬撼比利时「山寨王」安德列治。由于曼联嚟紧联赛仲要大战车路士，关乎争前4命运，加上今仗只係首回合，并非生死关头，以主帅莫连奴性格留力唔奇，安德列治实力有限，遇强唔会乱攻，中位数2.5球嘅入球细有1.77倍属最佳选择。 （Now 670及Fox Sports Play周五凌晨3时05分直播） 现时曼联处于一种两难局面，佢哋依家联赛排第5，打少1场下落后「4哥」曼城4分，仲有机会后上以前4完成赛季，抢得来届欧联入场券，但若然集中火力喺欧霸封王，同样可获参加下届欧联资格，究竟点样取捨呢，相信都几考起主帅莫连奴，但始终依家两边都仲有机会，「寸王」唔会咁蠢，将所有鸡蛋淨係放喺1个篮，因此联赛同欧霸两条战线都唔会放弃住。 曼联嚟紧周日英超要硬撼「1哥」车仔，对争入前4影响甚大，相比之下，今晚欧霸8强作客对安德列治始终係首回合，就算有乜依郁，下周中返主场踢次回合仲有得追，点计都唔及对车仔一仗咁重要，莫连奴今仗略作保留亦可理解，就算收起伊巴谦莫域、保罗普巴等主力都唔奇。由于係客场出击，加上仲有菲尔锺斯、基斯史摩宁及桑马达等伤兵，「寸王」今仗唔输都收货，返到主场先赢波都未迟，相信会排出比较保守嘅战术。 安德列治上两圈主场全细 另一边厢，安德列治上两圈喺欧霸淘汰赛击退辛尼特及尼科西亚，两回合共4场波有3仗总入球只达两球或以下，以中位数2.5球计，其中两仗主场都开细盘，今仗遇劲旅曼联更加唔敢轻举妄动，唔慌多波入，捧入球细最好路。