欧霸双杀过关士气高昂
周六晚西甲焦点战，西维尔主场硬撼「1哥」巴塞隆拿。西维尔虽然近期联赛走势麻麻，不过主场威力犹在，加上周中欧霸成功淘汰意甲劲旅拉素，士气返晒嚟，对住近况唔算乐观嘅巴塞，绝对顶得两嘴，西维尔受让必拣「让球主胜」。
（Now 632周六晚11时15分直播）
暂列积分榜第4位嘅西维尔近排联赛表现跌Watt，近3仗未赢过波频频失分，现时畀第5嘅基达菲追到只差1分，欧联席位危危乎。不过，佢哋喺周中欧霸就大打争气波，主场2比0击败意甲拉素，两回合计以3比0「双杀」过关，士气即时唔同晒。
其实，西维尔係一支典型主强客弱球队，喺主帅柏保路马捷恩带领下，今季11仗联赛主场取7胜3和1负，包括以3比0击败皇家马德里同1比1守和马德里体育会。如果计埋西班牙盃同欧霸就仲夸张，21场主场16胜3和2负，不败率超过9成，连今仗对手巴塞都衰喺佢哋手上，可见比斯祖安球场呢个「地狱主场」绝非浪得虚名。
中场核心班尼加复出
值得一提嘅係，今仗西维尔中场核心班尼加，坐咗两场波监后复出，有埋呢位阿根廷球星派牌，要喺巴塞身上攞分绝对「不是梦」。
另一边厢，巴塞隆拿最近陷入小低潮，近5场只取1胜，以「地上最强」嚟讲绝对不能接受。究其原因，主要同一班世界级攻击手突然哑火有关，除咗苏亚雷斯喺呢5场食白果外，早前伤愈复出嘅球王美斯，都明显未回复最佳状态，近4仗只係靠12码入得1球。加上巴塞今季作客明显冇以前咁sharp，近5仗作客取1胜2和2负，成绩毫无说服力，呢场面对强敌都好难全身而退，宁愿捧让球主胜好过。
