周四凌晨英超快车爆发伦敦打吡，啱啱喺联赛盃决赛输波嘅车路士，于史丹福桥球场硬撼热刺。喺联赛盃出晒丑嘅车路士，领队沙利现时十足被架空，车仔俨如「无人驾驶」，军心不稳，相反热刺伤疲尽起，射手哈利卡尼上仗已复出上阵，加上近年交手佔上风，今场一定趁机打落水狗，受让必捧下盘。
（Now 621周四凌晨4时直播）
未讲波先讲吓两队消息，喺联赛盃决赛公然违抗指令、唔肯离场嘅门将阿列沙巴拿加，事后公开道歉，虽然搞到咁大镬，但就只被罚一个星期人工，捐去车路士慈善基金了事，球会唔会有其他跟进，亦唔会影响到佢正选位置。相反热刺领队普捷天奴可能麻烦啲，上场联赛1比2不敌般尼后，佢走入球场闹球证甸恩，英足总会喺当地时间今日下午6点进行聆讯，有可能要被罚即时停赛，今场对车路士要做座上客。
热刺往绩佔优受让笋
不过，热刺近排凭住南韩前锋孙兴民不断士哥，总算捱过早前哈利卡尼、迪利阿里因伤倦勤嘅困境，带领这支北伦敦球队近5战4胜，虽然上仗输波，但「哈神」哈利卡尼复出仲即刻有波入，球队攻力有增无减。翻查纪录，两军近4次正面交锋，热刺取得3胜1负佳绩，摆明格食格。
车仔主帅沙利被炒传言甚嚣尘上，相信只係时间问题，即使拥有希古恩同佐真奴费路两名「子弟兵」，但二人明显未能融入原本班底，今场随时係球员夹计送走沙利嘅一战，即使主场都冇优势，热刺受让值得捧场。
