头场我哋仲会播哈化柏林主场对缅恩斯，哈化近期连仗遇强都有出色表现，佢哋近季嘅习惯，下半季喺主场都会有上佳表现，睇番近4场主场都赢唔到波，今晚遇上实力次一皮兼不擅作客嘅缅恩斯，係时候向首都球迷交代，一于捧主W。
（on.cc东网周六晚10时30分直播）
两军目前同列中游，要争下届欧战参赛资格机会淼茫，但又冇乜护级压力，喺咁嘅情况下，球员战意係决定胜负嘅最重要因素，哈化堂堂首都球会，但今年仲未喺主场赢过波，两场胜仗都係作客，点都有啲唔好意思，睇番球队近期表现同成绩，其实相当出色，佢哋近4场比赛都遇强敌，德国盃同联赛两战拜仁1和1仅负表现都极之讨好，作客大炒慕逊加柏更加係今季代表作，上轮主场对云达不来梅全场佔优踢到补时6分钟被逼和认真失运，今晚虽有守将列却克停赛，但迎战更弱嘅缅恩斯係时候喺主场赢番场。
缅恩斯风流波作客易散
缅恩斯人脚限米煮限饭，能够排到依家嘅第11位已经超额完成，所以上轮对史浩克04之前虽然3连败共失12球，但会方都同教练组续约，喺好消息刺激下，佢哋主场一鼓作气击败史浩克成功止跌，但其实对手因为喺欧联同曼联搏完耗力太多，缅恩斯只係靠反击制胜，睇番缅恩斯近两场作客面对奥格斯堡同禾夫斯堡都淨吞3蛋，一旦落后就好易散，今仗仲有防线大将保尔迪斯坐波监，球队又踢紧风流波，战意唔及志切喺主场重开胜利之门嘅哈化柏林。
