留力欧联半场抢爆乌甸
今晚意甲独脚戏，「1哥」祖云达斯主场迎战乌甸尼斯。祖记嚟紧周中有欧联生死战，今仗必定玩速战速决，好让C朗等主力早啲休息，而且「斑马兵团」近期联赛初段零舍抢缰，加上仲有「乌甸剋星」保罗戴巴拿助阵，今仗可速食对手，1.61倍半场主胜更值得捧场。
（Now 638及有线654、614、662、602台周六凌晨3时30分直播）
近年垄断意甲嘅祖记，早已将目标剑指欧联，但喺今届16强首回合作客马德里体育会先输0比2，下周中则会进行次回合，为晋级非胜不可，眼见今个周中曼联同阿积士喺欧联点样绝地反击，相信祖记唔会轻易放弃。而为免喺大战前夕增添伤兵，以及畀时间一班主力养精蓄锐，因此必定希望今场初段入多几粒，早早锁定胜局，下半场就可换走部分主力备战欧联生死战。
乌甸防线怕咗戴巴拿
虽然乌甸近排有啲起色，但只限于主场出击，佢哋近8场作客只得3和5负，当中有5场比赛更加食白果，依家仲有中场主力文拿高拉坐波监，实力弱上加弱。祖记除咗王牌C朗弗爆之外，另一前锋保罗戴巴拿更係「乌甸剋星」，呢位上月当选祖记最佳球员嘅阿根廷射手，近6次对乌甸入咗6粒，预计今仗又係佢表演机会。睇番近况，祖记出战联赛甚为抢缰，近5场联赛有4次喺上半场就取得领先，半场主胜有计。
