今晚为大家送上护级大战，奥格斯堡主场迎战汉诺威，今场我哋安排咗英语旁述，奥格斯堡近期全面回勇，接连喺强队身上得分，今仗仲有多名伤兵可以复出，有条件大胜气数已尽嘅汉诺威，让球盘奥格斯堡让半一超低水冇肉食，黑柴贪心啲，博有2.42倍嘅让球主胜。
（on.cc东网周六晚10时30分直播）
奥格斯堡现时排联赛榜尾4，佢哋本身实力唔係咁差，可惜季中长期受严重伤兵问题困扰，搞到成绩下滑要护级，不过近期佢哋大踢争气波，先係主场凭池东沅包办两个入球，爆冷赢咗一哥多蒙特，上轮又作客顶住三哥RB莱比锡强攻，力保不失抢番一分，能够喺呢两场硬仗成功抢分，成队波士气好到加零一，今仗赛前仲接连收到好消息，阵中3大主力包括首席射手艾费特芬保加臣、防线领袖古维利奥同中场校炮嘅莫拉域克齐齐伤愈复操，康复进度理想，今仗复出机会乐观，有番呢几位领袖助阵，奥格斯堡整体实力大幅回升，由于佢哋只係领先尾3嘅史特加3分，仍然有抢分压力，今场务必要击败实力次一皮嘅汉诺威，护级至可以鬆一口气。
汉诺威防线曳难翻身
汉诺威计实力同状态可以话目前德甲最差一队，近8场联赛输咗7场，近4仗每仗最少都失3球如不设防，已经成为降班铁胆。虽然上轮主场对利华古逊力战下输2比3，表面睇係近期最似样一仗，但要留意该役喺大雪中进行，场地根本唔适合比赛，搞到利华古逊球员无法发挥技术同组织，相反汉诺威摆双箭头一味空袭，至可以入到两球波，但最终搏到抽筋都无法抢得分数，实在非常气馁，日本前锋原口元气仲有一次射空门因为白界前积雪啜实个波搞到开唔到斋，黑仔到晕。今晚冇埋主场之利，佢哋今季作客12战未赢过共失34球，阵中仍然伤兵满营，到访奥格斯堡凶多吉少。
