简拿华路掌帅头炮
中国盃东道主中国今晚喺广西南宁迎战泰国，今场係中超广州恒大教练简拿华路兼任国足主帅第一击，新人事新作风，简拿华路选入唔少新脸孔，希望可以由师傅纳比嘅「大龄国家队」，换血变成一支有新鲜感嘅国家队，国足对泰国嘅优势係身高，今场应该会用高空轰炸，有8名广州恒大子弟兵喺手嘅「大简」，凭住对球员嘅熟悉，应该可以取得开门红，中国让1球要上盘。
（周四晚7时35分开赛）
简拿华路喺武磊免役下，亦选择唔拣肖智、郜林、于大宝，锋线上拣咗吕文君、董学升、谭龙同韦世豪4人，虽然未知对泰国场上表现如何，但4人喺新一季中超已经开斋，「大简」似乎都係以态选人，算係踏出新一步。
董学升担正高空轰炸
此外，今次国足有8人来自广州恒大，「大简」唔使花太多时认识及适应其他新球员，有指新国足嘅操练方法，同广州恒大相似，不过，内地传媒估计，简拿华路将会以华厦幸福嘅董学升担任正选。
两军年头亚洲盃交手，国足虽然反胜泰国2比1，但本来国足开局想打地面战，点知就一直老鼠拉龟，最终要用高空轰炸先反胜，董学升为正中锋，身体质素良好，简帅将会利用佢1米88身高冲击泰国防线，相信可以为佢带嚟首场胜利，信国足可以赢泰国，捧上盘。
