港人至爱今晚摆擂台
今晚续有多场欧国盃外围赛上演，港人至爱英格兰喺A组亮相主场斗捷克，仲要有免费电视直播，大家点可以错过！英军喺上年世盃及欧国联表现出色，今次沿用主力出战依然係信心保证，更何况英军喺温布莱主场出击向来打高一皮波，近6场主场赢5场，有力击败青黄不接嘅捷克打响头炮，英军让一球、球半波童捧上盘。
（香港开电视77台、有线602及662台周六凌晨3时45分直播）
修夫基增兵班底更强
英格兰赛前爆出退队潮，史东斯、戴尔夫、劳基梳尔、罗夫度斯卓克及阿历山大阿诺特因伤避战，不过主要骨干包括哈利卡尼、史达宁、迪利阿里及哈利马古尼等俱可候命，预计影响不大。「三狮兵团」喺上年世盃杀入4强及欧国联力压西班牙、克罗地亚出线，成绩有目共睹，而且阵中大部分主力都係当打之年，预期英军喺未来几年嘅国际大赛依然大有作为，不过领队修夫基冇原地踏步，继去年徵召效力多蒙特嘅新贵翼锋查顿辛祖，今次亦首度挑选车路士小将赫臣奥杜尔，又抢赢爱尔兰获韦斯咸防中迪格兰赖斯「变节」，加上仲有近期帮修咸顿射入唔少靓罚球嘅「死球专家」禾特普斯，呢班新血相信可为英军带嚟良性竞争，为博表现唔会放软手脚。
捷克青黄不接冇得挥
捷克虽然係欧国盃常客，对上6届都能打入决赛周，但近3届有2次分组赛出局，而且世盃已经连续3届无缘决赛周，明显处于青黄不接期，传奇门神施治已告别国家队，现时阵中稍具名气仅有罗马前锋柏德列舒希克、般尼前锋马迪维达及森多利亚中场积及赞图，论个人质素及国际赛经验，难与如日方中嘅英军相比。英格兰对上6场主场除咗喺欧国联以1比2输畀劲旅西班牙，其馀5场全部赢晒，今场英军让一球、球半唔怕多，上盘捧得过。
