欧洲国家盃外围赛B组首轮，葡萄牙主场迎战乌克兰。上届盟主葡萄牙有王牌射手基斯坦奴朗拿度（C朗）强势回归，风头火势乌克兰梗係唔敢乱攻，主帅舒夫真高有「防守专家」泰索迪傍住，造访葡军顶得两嘴，捧入球细。（有线603及604台周六凌晨3时45分直播）
祖记为保佢放弃赴美
葡萄牙王牌C朗喺早前欧国联获准挂免战牌，赛前有关佢效力嘅祖记消息，美国传媒报道，落实参加「国冠盃」嘅祖云达斯，将放弃美国站赛事，原因係球会担心因涉嫌强姦而被拉斯维加斯警方调查嘅C朗，入境美国会被捕，祖记今届只会出席亚洲站赛事。
讲番场波，上届盟主嘅葡军重召C朗归队，不过主帅费兰度山度士一向主打反击战术，C朗对住死守球队一定成为众矢之的，而且缺少空间打突击，进攻势必大打折扣。
眼见C朗强势回归，乌克兰都唔敢大意，主帅舒夫真高虽然係一代射手，但自从执教后坚重视防守，呢3年来有助教泰索迪帮拖，呢位昔日喺AC米兰与巴里斯、哥斯达古达及马甸尼组成钢铁防线嘅右闸，以防守老辣见称，喺佢调教下令乌军后防稳健度大有改善。唔单止喺早前欧国联B1组排第1获升班，近5场只失5球，有4场开2球或以下，今场作客一定稳阵至上。
