母校师弟撑场打气
今晚喺温布莱球场上演嘅英格兰足总盃4强战，由「蓝月亮」曼城硬撼白礼顿。曼城力争4冠王火力全开，白礼顿今季斗Big 6表现无惧色，一场过赛事必想偷鸡，斗攻格局，入球大（3.5球）乃不二之选。
（周日凌晨零时30分开赛，马会网上文字直播）
曼城喺2月尾击败车路士捧走英联盃，继续瞄准联赛、欧联及英足盃3项锦标，佢哋近期于各项赛事加埋连赢7场，上圈英足盃8强作客英冠球队史云斯虽一度落后0比2，但喺火力全开下最终反胜3比2，今届4场英足盃共轰19粒，全部开5球或以上。就算射手阿古路未好番，仲有史达宁、利莱辛尼、加比尔捷西斯担大旗，有本钱继续以攻代守，史达宁更买咗550张飞送畀母校Ark Elvin嘅学生，连交通费都搞掂埋，有师弟打气随时更落力。
白礼顿英足盃入到波
白礼顿喺周中联赛惨吞车路士3蛋，今季9次斗Big 6只得1胜1和7负，但7次输波有5次仅输1粒，唔係任人鱼肉。况且白礼顿今届英足盃5场，法定时间只得1场食白果，其馀4场入8球及失5球，杀入4强可谓交足货，今场对曼城拚输嚟打，随时有惊喜。曼城主W太热冇肉食，既然两军都攻得，转捧3.5球嘅大盘更上算。
