杜塞尔多夫主场对拜仁慕尼黑，我哋安排咗英语旁述。拜仁大炒多蒙特后上晒火，冲德甲7连霸势必勇往直前抢士哥，遇上现时德甲最冇压力同最开放嘅「超级神奇球队」杜塞尔多夫，注定入球停不了，今场大细中位数3.5球赔率太热，黑柴博有2.75倍嘅中位数4.5球大盘。
（on.cc东网周日晚9时30分直播）
拜仁炒完多蒙特气势如虹，最难得係冇欧战负担下，现时每周都有整整一星期备战联赛，球员体能同状态都有保证，不过佢哋绝对唔会掉以轻心，上次作客弗赖堡失分已经带畀佢哋唔少麻烦，何况首循环主场对杜塞尔多夫喺3比1领先优势下都被逼和3比3，可见对手绝对唔易啃，今战必会以最强火力争取更大领先优势，预期一开波就会围攻主队。
杜塞尔多夫享受开放足球
杜塞尔多夫近14场联赛赢咗9场，既冇护级压力又冇野心争踢欧洲赛，可以尽情享受开放足球，阵中比利时孖宝卢克巴基奥同宾尼图拉文，被誉为今季德甲反击最快嘅翼锋，前者至今喺德甲入咗8球仲有4个助攻，首循环仲成为17年来第一个作客安联球场连中三元嘅球员；后者入咗9球同4个助攻，由于表现超班，全队都明白下季好难留得住佢哋，所以更珍惜呢段合作日子，今晚有本钱喺主场同拜仁驳火。
不过，杜塞尔多夫今仗有前冇后，防线重心基斯素文因伤缺阵，佢今季德甲只缺席过1场，就係去年10月第8轮作客法兰克福，结果惨输1比7录得球会近20年来最大败仗，足见杜塞尔多夫冇咗佢有几大镬。
