欧联过后未回气
今晚西甲尾场，「1哥」巴塞隆拿主场迎战皇家苏斯达。巴塞喺联赛遥遥领先，啱啱于欧联激战完未回气，今仗随时畀苏亚雷斯等老将抖抖，而且近期于联赛主场见好即收，较少大手交易，加上皇苏造访鲁营球场只求输少当赢，捧3.5球嘅入球细最划算。
(Now 632周日凌晨2时45分直播)
依家西甲形势鲜明，巴塞已经甩开次席马德里体育会9分，剩番6轮，只要正常发挥，相信蝉联联赛锦标机会极大，所以依家可能会放更多精力喺欧联。吸取上季甚少轮换、导致欧联8强出局嘅教训，主帅华尔维迪亦学精咗，上仗联赛收起美斯、苏亚雷斯、拿杰迪锡等大批主力，作客闷和包尾嘅侯尔斯卡0比0，令佢哋喺周中欧联坚生勐，最终大胜曼联3比0，两回合计赢4比0晋级4强，考虑到对「红魔」之役搏得几尽，华帅今仗随时收起苏亚雷斯、布斯基斯等老将，赢波就算唔会去尽。
皇苏踢紧风流波
皇苏早排一轮抢分后，已站稳中游，既难争下届欧洲赛席位，亦不愁降班，踢紧风流波，当然造访鲁营，有边队会咁傻仔同巴塞抢攻呢？只求输少当赢。加上巴塞近期联赛主场见好即收，近4次喺鲁营出击嘅联赛全胜，但有3仗开2球或以下，捧3.5球嘅细盘更好路。
