中国人有句俗语「反转猪肚就係屎」！之前中国球星武磊加盟爱斯宾奴，唔少内地球迷即刻化身「爱奴」球迷，追踪「武球王」一举一动，全力为爱奴及武磊打气。不过球队上场作客和利云特2比2一仗，「武球王」畀主帅鲁比全场摆喺冷板櫈冇得出，搞到佢英雄无用「武」之地。
今晚斗切尔达难言稳胜
赛后一班睇住偶像「委屈」做后备嘅球迷，纷纷变做「键盘战士」，喺爱斯宾奴嘅社交网疯狂留言，闹爆鲁比及球会，仲有人留言话想见到佢哋降班，亦有人讲明唔用武磊，就会「Unfollow」球会，今晚爱斯宾奴主场对切尔达，唔知鲁比会唔会屈服搵番「武球王」落场呢？
不过就算「爱奴」有「武球王」压阵，要攞3分亦唔易，事关切尔达自从射手伊亚高艾斯巴斯复出后，战绩明显有改善，近5场联赛获3胜1和1负，其中艾斯巴斯个人劲轰6球。未计周三凌晨赛事，切尔达只比尾3嘅华拉度列多3分，仲未脱离降班威胁，今晚抢分决心肯定强过打风流波嘅「爱奴」，相信以切尔达近期状态同斗心，力足坐和望赢。
（Now 630及634周四凌晨2时30分直播）
