福地开骚孙兴民去到尽
今晚英超头场爆发伦敦打吡，「3哥」热刺于新主场硬撼「锤仔帮」韦斯咸。热刺嚟紧欧联4强要火併荷甲班霸阿积士，自然唔想嘥太多力，射手孙兴民欧联要停赛，变相今晚唔使留力，面对踢紧风流波嘅韦斯咸，呢位「Oppa」势必尽早争取士哥帮球队速战速决，加上近年交锋热刺经常半场领先，1.78倍半场主胜有计。
（Now 621周六晚7时30分直播）
热刺自从搬入新主场后坚老利，喺呢个球场出战4仗，录得全胜兼夹冇失波，更加喺欧联淘汰曼城杀入4强。热刺嚟紧下周中4强首回合先于主场迎战阿积士，虽然阿积士都唔嘢小，但能够避开巴塞同利物浦，绝对係佢哋闯入决赛良机，可能球迷会担心佢哋联赛会有所保留，但另一角度睇，热刺保住英超前4亦相当重要，既然依家领先「5哥」阿仙奴4分，喺「抢4」路途上佔得先机，若然今仗赢埋的话，对往后比赛调兵遣将绝对百利而无一害，加上射手孙兴民喺欧联4强首回合要坐波监，今仗可以毫无保留尽情争士哥，随时半场就领先对手锁定胜局，然后换走部分主力，最紧要踢得舒服。
韦斯咸风流波斗心鬆散
位处中游嘅「锤仔」韦斯咸既冇降班危机，但争欧洲赛席位亦淼茫，已经踢紧风流波等收咧，近4仗只得1和3负，计近6仗更有5次就半场落后畀对手，反映球员斗心鬆懈。何况查维亚靴南迪斯、安祖卡路尔、耶莫兰高及云斯顿列特有伤在身，战意、实力皆曳点信得过。就算单计双方近5次交手，热刺亦有4次上半场取得领先优势，半场主胜有买趁早。
