利物浦Vs阿仙奴 高普云格保帅大厮杀

近排球坛最轰动嘅事，一定係上季带领李斯特城爆大冷夺得英超冠军嘅神奇领队云尼亚里被「炒鱿鱼」，再次证明一刹那嘅光辉并唔代表永恒！另一位「云帅」云格季季带领阿仙奴都拎第4，冇乜大突破，今季终被大班厂迷要求佢落台，反对高普嘅声音都唔少，皆因利记近5场联赛只赢得1场咁大把，相信两位名帅为保面子，喺今晚利物浦对阿仙奴嘅大战中，一定使出浑身解数抢分，入球唔慌少呀，入球大细中位数2.5球，心水推介入球大！ （Now 621及LeSports HK应用程式周日凌晨1时30分直播） 红军劫富济贫冲4 on fire 「红军」利物浦最近喺联赛遇强愈强，遇弱愈弱！对热刺、车路士、曼联同曼城等强队统统抢到分，但往往对弱队嗰时就失分，名副其实嘅「劫富济贫」呀！佢哋上场联赛爆冷以1比3轮畀李斯特城，搞到高普赛后嬲嬲猪，仲警告班球员要醒醒定定，否则就会调动正选名单呀！目标以前4完成今个球季嘅红军，暂时喺积分榜排第5位，只落后第4位嘅兵工厂1分，今仗可以话係不容有失呀！相信佢哋今晚一定会on fire搏到尽，攻势唔会少！ 兵工厂蓄锐13日搏甩髀 另边厢，阿仙奴上一场比赛已经係2月21号对瑟顿联嘅足总盃比赛，成班球员唞咗10日先嚟到今晚对红军嘅大战呀，佢哋早前仲闷到拉大队去「碌龄」解闷添呀，似乎对呢场大战好有信心！不过，厂迷对领队云格嘅信心就开始动摇啦，云帅同兵工厂嘅合约今个夏天就届满，虽然佢已经讲到明唔会离队他投，但始终都要交出表现以稳民心，今晚嘅大战绝对係表演嘅好机会！再加上两军相遇，惯性上演「入球骚」，近6次交手，有5次总入球都係3球或以上，预料双方为抢分争名次，今场会携手合演大厮杀，入球大绝对係明智之选。