欧战毕业联赛搏杀 热刺抖够抢糖食

热刺今季主场可谓着晒火，联赛已取得8连胜，更係英超主场唯一不败之师，佢哋疯狂进攻兼压迫打法，往往令对手有气冇碇抖，随住欧洲赛出局，上周中终于冇比赛，令球队有时间休养生息，今晚主场对爱华顿让半一，乐比睇好上盘。 （Now 621及LeSports HK应用程式周日晚9时30分直播） 两军统帅普捷天奴同朗奴高文有唔少渊源，除咗之前都曾执教修咸顿，两人最近亦盛传係下季巴塞教练热门人选，普捷天奴近年教热刺成绩有目共睹，加上熟悉西甲，本係合适人选，但佢同巴塞非亲非故，讲「血统」似乎又唔及朗奴高文呢位前巴塞名宿咁纯正，不过两人异口同声话最紧要教好今季先，讲到尾都要今季交到成绩先有议价能力。 机动性打法有料到 热刺暂时落后榜首车路士10分，争标仍未完全绝望，就算未能后来赶上，都要保住前四欧联席位，因为其馀几队都係落后几分虎视眈眈，不过乐比就对热刺充满信心，因为讲球员名气，热刺或者唔及其他BIG 6球队，但讲到球员机动性，热刺就绝对比其他球队优胜，强如车路士同曼城，作客白鹿径都捱打输两粒，爱华顿要全身而退绝非易事。 事实上，热刺今季赢嘅就係默契，领队普捷天奴花咗两年半时间慢慢执队波，当中核心阵容并冇大变动，所以今季无论係踢4231或343阵式，球员适应都非常好，而且球员处于当打时期，行军之迅速及压迫力之强，往往令对手半场就扯白旗，好似上仗半场已大炒史笃城4比0，下半场直头练波咁练。 拖肥糖作客差一截 虽然有消息指后衞维顿汉及艾达韦列特均有伤在身，但普捷天奴透露2人伤势甚轻，仍可以上阵，况且热刺今季习惯轮换，影响未必太大。爱华顿近期表现不俗，但分数多来自主场，拖肥糖作客白鹿径已多年未威过，睇怕今场都难翻身！