阿仙奴米堡斗充大头鬼

防线唔掂以攻代守 英超今晚上演独脚戏，由阿仙奴作客护级分子米杜士堡，「兵工厂」近期状态同士气都跌落谷底，全队上下都愁云惨雾，对住排尾2嘅米堡都唔敢话Sure Win。阿仙奴近期中门大开，失波好似倒水咁倒，今仗对住急于抢分护级嘅主队，势必齐齐充「大头鬼」狂攻，中位数2.5球大盘，1.62倍趁热食。 （Now 621及LeSports HK应用程式周二凌晨3时直播） 今次係阿仙奴连续第2个星期作客出战周一压轴战，上个星期作客水晶宫惨吞3蛋，领队云格遭逢阿仙奴执教生涯首次联赛作客4连败，当中最大问题係防线全面崩溃，4场输波都被对手攻入3球，近9仗联赛作客只係有1仗能够保持清白之身，而且全部总入球都达3球或以上。 阿仙奴唔识防守已经係人所共知，但佢哋进攻能力绝对唔弱，今季15仗联赛作客入30球，平均每仗作客可入2球，阿历斯山齐士、韦碧克、禾确特、基奥特同奥斯尔等攻击手全部候命，「兵工厂」仲想争入前4嘅话，今仗係非胜不可，放手狂攻係好正路。 尾2米堡护级冇退路 至于主场嘅米杜士堡依家排联赛尾2，落后尾4嘅侯城6分，要逃出生天嘅话一定要全力争胜，就算和波拎1分对护级都冇乜帮助，既然已经冇退路，今仗藉住主场之利肯定抢攻，趁阿仙奴状态低迷博大雾，希望执晒3分，而且西班牙箭头尼格度月初打破入球荒，有望喺阿仙奴条疲弱防线搵到食。