白礼顿冲超主场先除根

英冠进入大直路，榜首白礼顿今晚有望迎来历史性时刻，佢哋今仗只要主场赢韦根，再加上第3位哈特斯菲尔德失分，就可以首次升上英超，唔止係一种荣誉，下季更加能够透过英超电视转播及商业赞助，获取近2亿镑（约19亿港元）收入。白礼顿肯定搏老命，绝对唔会放过尾二嘅韦根，直取让球主胜。 （周一晚10时开赛） 英冠只剩下4至5轮联赛，白礼顿、纽卡素已带出，好大机会以前2位直接升上英超，第3至6位球队需要踢附加赛，争夺馀下1个升班席位。白礼顿过去4季有3季喺升班附加赛出局，同英超擦身而过，认真悲情。不过今时唔同往日，白礼顿现时抛离踢少1场嘅哈特斯菲尔德12分，得失球差多哈军31球，升班资格十拿九稳。如果哈特斯菲尔德今晚作客赢唔到打比郡，而白礼顿赢波，更可立即获升班资格。 事实上，白礼顿锐不可当，取得4连胜，包括上仗作客以2比0轻取狼队，近13场主场更加赢咗11场，点睇都冇可能失拖。至于对手韦根虽然取得2连胜，但都係主场，而且两战失4球，防线唔稳阵，加上近5场作客4败，试问又点抵挡得住如日中天嘅白礼顿呢？ 哈特斯遇打比郡易失分 另一场，哈特斯菲尔德好可能「助攻」白礼顿升班，因为哈军近6次作客打比郡，全败收场，1分都未攞过，睇怕今仗失分机会极高，白礼顿球迷真係可以买定香槟庆祝喇。 （周二凌晨零时开赛）