阿仙奴崩溃中埋病毒 林肯城硬淨顶到半场

近日大家见证过，足球场係充满奇迹嘅地方，今晚英足盃8强大战，「奇迹球队」林肯城作客英超嘅阿仙奴，两队波联赛排名相差89位、球员身价更加係天同地比，不过讲到士气同斗心，非联赛球队林肯城绝对赢晒！立立乱嘅阿仙奴哀兵上阵，要破林肯城铜牆铁壁冇咁易，3.85倍「半场和」值博。 （LeSports HK应用程式周日凌晨1时30分直播） 近期喺多条战线失利嘅阿仙奴依家腹背受敌，上轮联赛作客输畀利物浦后已跌出前4，周中欧联耻辱性出局，唔单止球员体力消耗，最惨係士气严重崩溃！睇住球迷不断抗议要领队云格落台，王牌球星阿历斯山齐士又话同队友不和，奥斯尔、阿历士张伯伦又传唔续约想走，赛前仲爆出病毒危机，消息话奥斯尔病咗几日之后，又轮到韦碧克同伊禾比感染卧病，军医急急将佢哋隔离以免更多人中招。 6万阿迷随时倒戈撑客军 阿仙奴上一圈同样对住非联赛球队瑟顿联，但只能够小胜2比0，虽然今仗係主场出击，但「兵工厂迷」近期大搞游行示威，球队由领导层、领队到球员都成为箭靶，球员喺酋长球场出击已经唔见得係优势，反而要承受更大压力。正如林肯城守将禾达科赛前话：「我知有阿迷想球队输波逼云格走，如果我哋个头开得好，到时或者有6万人会撑我哋！」 林肯城係今届英足盃巨人杀手，对上3圈先后淘汰英冠嘅叶士域治、白礼顿同英超嘅般尼，成为103年来首支杀入8强嘅非联赛球队，实力不容小觑。林肯城为今场波非常认真备战，领队丹尼高尼更特别向韦斯咸领队比历借场，近日拉队去到「锤仔」嘅训练场操练。 由于今届足总盃行新制度，8强开始唔会再有重赛，90分钟打和就加时同互射12码，而且加时阶段仲可以额外换多1个球员添，林肯城只要守得好呢90分钟或者120分钟，就有机会创造奇迹！佢哋周中4比0大胜一仗，近6场比赛有5场保持不失，而且擅长死守，佢哋近4仗英足盃有3仗上半场同对手打和，上半场好气好力嗰阵，要入佢哋波真係唔易。