地狱3连战头关唔易捱 飞脚让波东京着数晒

有份参战亚冠盃嘅日职球队大坂飞脚将于今晚登场，喺主场迎战日职两战全胜嘅FC东京。近期连场征战嘅飞脚，不但状态唔及FC东京，而且对赛往绩亦处于下风，嚟紧下周中又要喺亚冠盃主场对FC江苏，班球员心分二用实影响演出，主场根本冇本钱让波，让球盘飞脚让平半，阿谦推介FC东京下盘。 （有线61及201台周六晚6时直播） 飞脚上季联赛首阶段受出战亚冠盃影响，头9场联赛只得4胜5负，当中主场5战更输咗4仗，可谓「主场不利」。飞脚今季开咧表现同上季相若，首仗联赛主场只能1比1打和甲府风林，亚冠盃主场出战更以1比4惨负南韩球队济州联，对兵源不足嘅飞脚嚟讲，要兼顾两条战线明显相当吃力，尤其是由今日起计，飞脚8日内连斗东京、江苏同浦和红鑽，场场硬嘢，呢个「地狱3连战」好恶啃。 FC东京火力非凡 而且，飞脚最大问题係改打3后衞，门将藤谷阳介，中场主力小将井手口阳介又伤埋，中场扫荡力减弱，防线极不稳定，何况佢哋近4次喺联赛对FC东京只得2和2负，即使主帅长谷川健太落咗非胜不可嘅军令，相信呢个头关都好难突破。 FC东京上季首、次阶段皆排联赛第9位，成绩不过不失，球队今季重整旗鼓，分别由川崎前锋、名古屋鲸鱼罗致两大射手大久保嘉人及永井谦佑加盟，中路同左边攻击力特强，日前签埋广岛三箭前锋彼得乌达卡，令攻击点更多更广，更加恐怖。 睇番FC东京开季两仗分别以1比0击败上季冠军鹿岛鹿角，同2比0淨胜升班球队大宫松鼠，连续两仗保持零失球，就知佢哋攻守好平衡，今仗虽有中场米本拓司、尾山阳平、平冈翼因伤唔踢得，但影响唔算太大，作客有力反客为主。