巴塞再战祖记鲁营大反击

美斯保罗戴巴拿斗入波 今晚欧联8强次回合爆发生死战，巴塞隆拿返主场再斗祖云达斯，亦是两位「美斯」大对决。巴塞首回合输0比3，冇得再缩一定要谷，球王美斯再次肩负起「开火」重责，好拍档尼马嚟紧联赛「国家打吡」对皇马要坐波监，佢唔使留力一定搏到尽，食住近10仗喺鲁营主场出战欧联赢晒个势，梗係想继16强后再演超级大逆转，但防线谷得太前，撞正好番嘅「新美斯」保罗戴巴拿率领嘅祖记快速反击，随时合演入球骚，大盘[3/3.5球]有买趁早。 （有线61、64、201及203台周四凌晨2时45分直播） 巴塞喺首回合作客畀祖记前场逼抢逼到频频断缆，加上防中布斯基斯停赛下令防线冇晒掩护，被祖记嘅「新美斯」保罗戴巴拿省两粒及基亚连尼头槌建功惨败0比3，连1个作客入球都抢唔到，已经企喺出局悬崖边，今仗至少要入番3粒兼唔失波，先博到踢加时，真係需要奇迹。不过「地上最强」擅于创造奇迹，上圈16强硬撼巴黎圣日耳门（PSG），先喺首回合作客输0比4，次回合返回鲁营主场靠锋线「MSN」美斯、苏亚雷斯及尼马共入4粒，连同对方乌龙波及沙治罗拔图嘅绝杀赢6比1，两回合计反胜6比5奇迹晋级，今仗梗係想重演超级大逆转喇。 巴塞近10欧联主场轰40粒 睇番巴塞近10仗欧联主场出击唔单止赢晒，而且合共狂轰40粒，证明巴塞喺鲁营嘅主场威力超恐怖之馀，亦可见以「MSN」为首嘅锋线火力唔係人咁品，球王美斯今仗又要孭重飞，而尼马因嚟紧联赛「国家打吡」对皇马要坐波监，今仗更可无后顾搏甩髀，佢喺对PSG嘅次回合末段入2粒兼製造绝杀助攻，係成功逆转嘅最大功臣，今仗随时又嚟料。不过巴塞一向攻强守弱，特别係近年中场控球能力大不如前，令原本唔多稳阵嘅防线错漏百出，单计今届9仗欧联已失咗12球，勍算布斯基斯刑满复出，但中坚马斯真兰奴因伤上阵成疑，搞到教头安历基头都痕埋。 祖记擅反击 作客入到波 另一边厢，祖记揸住3粒喺手，但主帅阿里基吸取PSG被淘汰嘅教训，今仗造访巴塞唔会斋守坐以待毙，睇准机会必拮多佢一刀，佢仲收到好消息，日前联赛伤出嘅保罗戴巴拿已经复操，今仗好大机会可披甲，首回合佢飘忽走位兼速度坚快玩残「地上最强」后防，加埋文迪苏杰及希古恩，係祖记打反击嘅杀着。遇啱今仗巴塞要焗攻，防线被迫要移前，令祖记有更多空位打反击争取作客入球，相信今仗会大手交易，一于捧[3/3.5球]嘅大盘。