CF格兰纳达让主过关稳

今日有近百场波，难免会花多眼乱，等我阿King帮大家搵好嘢喇。是日重心推介场次，係西甲尾场CF格兰纳达主场硬撼马德里体育会。马体会下周中有欧联跟尾，今仗未必会搏尽，加上CF格兰纳达一向靠主场搵食，力争抢分护级战意秤先，受让必捧让球主胜。 （Now 632周日凌晨3时45分直播） 老实讲，马体会都需要为保前4欧联席位抢分，但始终欧联16强次回合主场对利华古逊于下周中烧到埋身，点都紧要啲，眼见巴塞喺欧联首回合落后0:4之下，喺刚周中次回合赢番6:1大逆转晋级，就算「床单兵团」首回合赢利华4:2亦唔敢大意，连「王子」费兰度托利斯都话巴塞反胜提醒咗佢哋，一日球证未吹鸡完场都唔好咁老定，各人嘅心思明显已飞晒去下周中嘅欧联，今仗对CF格兰纳达相对冇咁重要，主帅施蒙尼留力唔奇。 战意赢马体会一条街 未踢今轮之前，CF格兰纳达仍排紧尾3，落后「安全区」尾4嘅拉科鲁尼亚5分，必定搏命为护级抢分。但话说回头，CF格兰纳达歇冬后略有起色，尤其係于冬窗买入嘅箭头阿祖安拉莫斯极速融入，并带动到球队嘅进攻，加上今仗有守将乌捷艾保及加斯顿施华刑满复出，挟主场3连胜气势，绝对唔赦心不在焉嘅马体会，仲有得受让咁笋，让球主胜有买趁早。 串热拿亚大唐迪拉细 同时间意甲有热拿亚市打吡战，由热拿亚「挂名主场」对死敌森多利亚，由于两军伤疲尽起，每逢打吡战佢哋都唔想输一定打甩髀，近3次交手总入球皆至少有3粒，一于捧大盘。 （TVB 302周日凌晨3时45分直播） 最后係葡超唐迪拉主场硬撼劲旅士砵亭，唐迪拉近8仗联赛有6仗食白果，而士砵亭近期攻力略见下滑，转捧入球细好过。 （有线155台周日凌晨4时30分直播）