比洛迪着火反客为主
今晚欧国外J组榜首大战，「2哥」芬兰主场迎战「1哥」意大利。芬兰虽然异军突起，但意大利有「新韦利」比洛迪脚风转顺，头5场欧国外赢晒已重上正轨，食住个势有力反客为主，客胜有买趁早。
（有线604及603台周一凌晨2时45分直播）
上年冇份打世盃嘅意大利，知耻近乎勇，在主帅文仙尼带领下，逐渐从稳守突击过渡至控球为主嘅打法，而在433阵式中，佐真奴费路、马高华拉堤及尼高路巴列拿已锁定3人中场嘅正选席位，有利发挥。而且箭头比洛迪状态回勇，上仗省两粒助球队反胜阿美尼亚3比1，仲食咗两铺诈胡添，坚抢缰，呢位拖连奴前锋无论头槌、射术及速度都唔错，被传媒形容终于搵到韦利接班人，事实上自韦利退役后，意大利甚少出产呢类多产中锋，佢依家咁弗，随时成为文帅嘅中锋首选。
芬兰迪姆普基易被盯死
芬兰喺射手迪姆普基助阵下，今届表现突出，头5场欧国外取得4胜1负，依家排紧第2位，领先「3哥」波斯尼亚5分，形势唔错，不过输嗰场正正係对意大利，明显输质素。而且芬兰靠晒迪姆普基单天保至尊，今届所入嘅7球中，有4球係嚟自呢位诺域治前锋，一旦将佢盯死，成队进攻即陷于瘫痪。意大利今届欧国外头5场全胜，令文帅成为球队史上首位带队打欧国外连赢5场嘅领队，加上近6次交手「蓝衫军」赢晒，格食格之下，客胜捧得过。
