今晚意甲头场爆发首都打吡，拉素「挂名」主场迎战同市死敌罗马。两队积怨甚深，每次碰头都激到打甩门牙带血吞，双方射手恩莫比尼及迪斯高一早挞着晒，为抢W必定火力全开，2.5球嘅入球大乃不二之选。（my TV Gold 301、Now 638、有线654、614、604及603台周一凌晨零时直播）
拉素恩莫比尼弗爆
拉素开季极速上力，首轮造访「硬骨头」森多利亚照样大胜3比0。唔单止中场路尔斯阿拔图交出2次助攻，射手恩莫比尼更省两粒弗到爆，呢位经常失机为人诟病嘅意大利国脚，要用实际行动证明自己有料到，查实佢踢亲打吡都零舍醒神，近6次有份上阵对罗马嘅赛事，佢入咗5粒，堪称罗马煞星。
罗马踢法有前冇后
另一边厢，罗马喺首轮3度领先之下，仍被热拿亚逼和3比3，防线穿晒窿坚唔稳阵，近日立即从曼联借入中坚基斯史摩宁，未知能否赶及披甲，但呢位后衞出晒名多甩漏，就算上阵都唔帮得几多。好彩之前同球队续约嘅王牌箭头迪斯高挞着晒，首轮有入波之馀，仲助攻畀前线拍档辛基斯安达先开纪录，既然防守唔掂，势必以攻代守，希望用赢打吡攞彩兼重上正轨。两队为抢分为面子，一定搏甩髀激到爆，近6次交锋有5次开3球或以上，2.5球嘅大盘有买趁早。
