宿敌对决必搏槌
今晚欧洲国家盃外围赛C组爆发宿敌对决，德国喺主场火併荷兰。「日耳曼兵团」于欧国外3战赢晒狂轰13粒，前锋迪姆华拿近期脚风转顺，伙拍基拿比、马高列奥斯火力一样咁勐；荷兰要争出线亦唔会坐以待毙，加上两军咁多牙齿印，近年碰头例必斗攻，捧中位数2.5球嘅入球大更划算。
（有线662及602台周六凌晨2时45分直播）
迪姆华拿弗到漏
德国上年于世盃灾难性出局，儘管主帅勒夫坚持「死因」唔可以赖晒传控打法出事，但佢之后亦作出微调，加入更加直接嘅反击元素，头3场欧国外赢晒之馀，更攻入13球，成功从谷底反弹。今次虽有王牌利莱辛尼因伤落选，好彩前锋迪姆华拿及时翻生，开季3场联赛为RB莱比锡轰入5球。翼锋基拿比近6场国际赛亦入4粒，连同靓仔球星马高列奥斯连续2场欧国外有士哥，德国火力唔讲得笑。除咗上述嘅三叉戟之外，勒夫今次首度徵召新人禾特舒密特，呢位弗赖堡前锋唔单止开季频有入波，喺之前U21欧国盃更以7球荣膺神射手，势必成为德军秘密武器。
另一边厢，荷兰由于之前要出战欧洲国家联赛，所以喺欧国外只踢咗2场，可惜仅获1胜1负得3分，落后打多1场嘅德国6分，亦比打多2场嘅北爱少9分，为求出线係时候要抢分。「橙衣兵团」一向崇尚进攻，喺头两场欧国外攻入6粒，攻力未见走样，不过年轻中坚马菲斯迪历特今季转战意甲后，仍适应新环境影响状态，颇多甩漏，令防线存隐忧。
近7交锋入22球
由于两军太多牙齿印，1974年前西德令赢尽掌声嘅荷兰失落世盃，1988年轮到「橙衣兵团」喺德军地头勇夺欧国盃，令每次交手都充满火药味，誓要赢波攞彩，容易炮製入球骚。讲到近7次正面交锋，两队共轰入22球，其中6次开3球或以上，包括今届欧国外首循环德国作客险胜3比2，荷兰为抢分为面子，今仗战意必坚实多波入，转捧2.5球嘅大盘稳阵。
