讲到德甲冠军，每年大热门当然係班霸拜仁慕尼黑，佢哋已经连续赢咗6届，不过黑柴季前讲过，今届形势并唔係表面睇咁一面倒；拜仁夺标赔率热透，正好为大家提供较有分头嘅博冷机会，黑柴始终相信多蒙特最有条件截拜仁胡，推介有5.5倍嘅多蒙特冠军。
莱比锡曝光值博率低
上季多蒙特沿途领放，到季尾至畀拜仁追到，最终仅以2分之差失冠，而莱比锡就落后拜仁12分过终点得第3。嚟到今季，多蒙特增兵最积极，目前人脚实力已不在拜仁之下，兵源尤有过之，而且亦已累积足够经验，只係因为第3轮联赛滑铁卢，夺冠呼声立即降温，反而换嚟好赔率，要知道拜仁虽然喺转会窗关闭前引入菲腊比古天奴、比列锡同米高古辛斯，实力係明显提升，弊在3线配搭仍欠均匀，尤其防中弱点并冇针对性改善，今季预期仍然需要再一次同多蒙特斗到最后。
拜仁嘅足智彩夺冠赔率一直热透，目前更落飞至1.17倍，次热多蒙特因为国际赛前不敌柏林联，立即由3.9倍回升到5.5倍，至于至今德甲唯一全胜之师RB莱比锡就逐步落飞，现时係7倍嘅第3热门。黑柴基本上肯定今届冠军不出呢3队，不过赔率唔足以反映真正机会率，我认为拜仁夺冠机率大约只有45%，多蒙特35％，莱比锡就有剩番嘅20%。拜仁夺冠机会依然在多蒙特之上，但赔率太悬殊，多蒙特就好值博。至于第3势力莱比锡今季换帅增兵实力亦有提升，阵中小将经过3季德甲磨练不断进步，不过由于开季太顺已受各方关注，目前赔率同多蒙特差唔多，值博率相对较低。
