科里斯回巢屈福特大无畏
今晚英超上演「蓝黄」对决，由「蓝月亮」曼城喺主场迎战「大黄蜂」屈福特，亦係两军西班牙教头哥迪奥拿与科里斯正面交锋。曼城上仗联赛大意输波，今仗不容再失必火力全开，但屈福特遇强都唔做缩头乌龟，加上近年碰头例演入球骚，3.5球嘅入球大有买趁早。
（Now 621周六晚10时直播）
哥迪奥拿出身自巴塞隆拿，科里斯曾执教华伦西亚、马体会及爱斯宾奴等西甲球队，两名西班牙主帅均崇尚进攻足球。哥迪奥拿麾下嘅「蓝月亮」开季5场联赛合共狂轰16球，比「1哥」利物浦仲多1粒，总入球全开4球或以上。除咗箭头阿古路场场有士哥之外，史达宁于联赛亦有5球进帐，奇云迪布尼与大衞施华则合共交出9个助攻，仲有马列斯愈踢愈好，于周中欧联赢萨克达有入波兼助攻，火力强劲。
费兰甸奴客串中坚劲牙烟
不过曼城守将拿朴迪因伤长抖，史东斯伙拍奥达文迪扼守中路坚牙烟，上场联赛作客诺域治爆冷输2比3，今仗连史东斯都伤埋，焗住要搵费兰甸奴客串中坚，稳健度始终差啲。
开局曳爆嘅屈福特，早前怒炒主帅查维加西亚，并邀请科里斯回巢掌舵，上场联赛对住劲旅阿仙奴，喺一度落后2粒之下仍大举进攻，全场攻门多达31次，最终连追2球打和2比2，士气大振，亦证明科里斯就算遇强都唔玩死守。何况双方近6次交手，有5次总入球开4球或以上，包括上届英足盃决赛曼城狂数6比0，今场捧3.5球嘅大盘最好路。
