射手当弗连续15场士哥
美职斗到去最后直路，各队都要为争入季后赛努力，同时神射手之争亦都好激烈，今日阿King就搵射手榜领先嘅3位球员所效力嘅球队做度波起点，再综合埋常规赛形势，介绍条美职3串1畀大家。最好路係阿特兰大联主胜，佢哋嘅射手祖斯夫马天尼斯连续15场联赛有波入，弗到冇朋友，主场对圣荷西地震必全取3分。
（myTV Gold 302、Now 639、有线655及615台周日凌晨3时30分直播）
祖斯夫马天尼斯现时以26个入波，同洛杉矶银河嘅伊巴谦莫域并列射手榜次席，至于阿特兰大联喺东岸排第3，落后榜首嘅纽约城6分，比「二哥」费城联只少1分，争第2甚至东岸冠军唔係冇价讲。委内瑞拉前锋祖斯夫马天尼斯连续15场有波入，合共射入21球，挟呢个惊人纪录，肯定可以帮球队全取3分。
银河冲击季后赛 伊巴必搏
至于伊巴効力嘅洛杉矶银河就主场出战蒙特利尔冲击，银河现时排西岸第5，只比排第8嘅波特兰伐木者多2分，至于冲击就排东岸第9，同第7嘅新英伦革命只差3分，双方都要为季后赛席位努力，银河近6仗主场5次开4球或以上，火力全开，今仗随时再演入球骚。
（myTV Gold 301、Now 638、有线654及614台周日早上10时30分直播）
最后讲埋场FC洛杉矶对FC多伦多。FC洛杉矶前锋卡路士韦拿以28球暂时领先射手榜，但球队已经提早夺得西岸冠军，馀下赛事唔使太搏命，事实上佢哋联赛已经4场不胜，FC多伦多或有机会偷鸡，让球客胜捧得过。（myTV Gold 302、Now 639、有线655及615台周日早上10时30分直播）
最长入波纪录仅次美斯
美职7月最佳球员、阿特兰大联神锋祖斯夫马天尼斯，先喺8月23号对奥兰多城嗰阵，创造连续12场联赛入波新纪录，到咗9月18号赢FC辛辛那提场波，进一步将个连续入波纪录扩展至15场共入21球，成为仅次于美斯（21场33球），拍住挪威球员咸利（15场21球），喺最长连续建功世界纪录榜排第3位，而且今场有望升上次席。其实呢位26岁委内瑞拉国脚，曾经喺44场联赛内6次连中三元，都係一项美职纪录。
