弗利克擅长振奋士气
欧联分组赛B组，榜首德甲拜仁慕尼黑，迎战榜尾希超奥林比亚高斯，拜仁阵前易帅，助教汉斯弗利克接任临时教练，预期有助提升众将斗志，虽然球队3日后有国家打吡大战多蒙特任务，但的确急需一场漂亮胜仗振奋士气，只係防线欠稳嘅隐忧难以速决，遇上防线曳爆，但擅打反击嘅奥林比亚高斯，黑柴推介中位数3.5/4球大盘。
（Now 644、有线662及602台周四凌晨1时55分直播）
拜仁上周末德甲作客以1比5惨败于法兰克福脚下，令高层决心即时换帅，事实上尼高高华确实抵炒，佢固然令部分功勳主将因为上阵时间不足而不满，本身执教嘅战术同调动能力亦一再受到质疑，对法兰克福之役，中坚谢路美保定开波冇耐已被逐离场，但尼高高华喺拜仁受压下完全冇作出相应调动，直至输到1比4至换入查维马天尼斯止血，睇到高层同球迷拧晒头。
安慰马天尼斯牵动人心
暂代主帅弗利克曾任德国国家队助教8年，亦係2014世盃夺标功臣，最重要係球员生涯曾经为拜仁上阵过超过100场比赛，绝对合乎高层心目中嘅自己人条件，而弗利克今季最予人印象深刻嘅举动，就係上月初联赛不敌贺芬咸，喺看台安慰因为输波同冇得落场而痛哭嘅查维马天尼斯，呢一幕牵动无数拜仁球迷嘅心，佢擅长同球员沟通，临危受命有助提升士气。
奥林比亚高斯场场入波
拜仁前线虽有罗拔利云度夫斯基继续着火，一众攻击球员质素亦高，但球队已连续8场正式赛事失波，一条软弱嘅中场无法阻截对手反击，今晚恐怕都难保清白之身；奥林比亚高斯喺B组3战共失8球防线曳爆，但前线反击却场场入到波，上轮欧联主场不敌拜仁但入到两粒，今晚作客安联球场已经冇晒压力，想保持出线希望亦只能焗攻，料会同拜仁再演入球骚。
