A山阿古路射手对决阿仙奴曼城温布莱驳火

今晚阿仙奴同曼城，将会喺中立场温布莱合演英格兰足总盃4强赛事！两队4月初时先喺英超联赛交过手，当时双方表现不相伯仲，最终以2比2打成平手。今晚嚟到淘汰赛，相信佢哋嘅攻力一定有增无减，战意更加激昂，预料两队将会携手合演一场「入球骚」，心水推介3.5球嘅入球大。 （LeSportsHK应用程式周日晚10时直播） A山係英超作客入波王 阿仙奴啱啱喺星期一英超联赛对战下游球队米杜士堡，凭住阿历斯山齐士（A山）同埋「大眼仔」奥斯尔两大主力上、下半场各建一功，以2比1险胜对手，全取3分，保住前4希望。山齐士更攻入个人今季英超第13个作客入球，冠绝其他英超球员，绝对係名副其实嘅「作客王」呀！而呢场比赛其中一大焦点，就係领队云格竟然排出一条3人防线，係云帅20年嚟嘅第一次！早前喺对曼城呢场比赛嘅记者会上，云格就话今晚呢场大战可观性非常之高，希望兵工厂可以拎到首个入球，仲话3人防线令球队后防更加稳定，皆因阿仙奴最近失波多，近8场比赛场场开大，失波仲多过入波！既然上场用「3人防线」呢招使得，相信今晚云帅好大机会照办煮碗！ 阿古路今季39场入29球 另边厢，养伤11个月、自从上年5月只上阵过8场比赛嘅曼城队长高柏尼已经伤愈复出，喺上场英超踢足90分钟都无问题，状态逐步提升，上仗更为球队顶入一球打开纪录，协助曼城大炒修咸顿3比0。就连领队哥迪奥拿赛后都大讚队长交出表现，係一位真真正正嘅领袖中坚，有佢上阵嘅比赛可以稳定军心。另外，王牌射手阿古路开季至今为蓝月亮上阵39次，合共攻入29球，入波效率极高！最近外界盛传阿古路下季会离开曼城转投皇马，如果传闻属实，相信阿古路一定大踢身价波！况且双方上一次交手就係4月2日嘅英超联赛，当时两队互有攻守，最终踢成2比2和气收场。但喺今晚嘅4强战就一定要分出胜负，相信佢哋为咗争入决赛，一定会斗到难分难解，入波又点会少！入球大细中位数3.5球，入球大绝对係信心之选。